Hann Brúnó okkar er alveg yndislegur - svolítill kjáni - búinn að vera rosaleg duglegur með stykkin sín og allt það en kemur fyrir að pissi inni...Verstar eru þó enn næturnar og bílferðirnar. Hann er alveg brjálaður í bil. Þ.e. ef hann er hafður í búri í bíl sem ég auðvitað verð að gera þar sem ég er oftast einn með hann í bílnum. Hann spangolar og grætur eins og rakki á eftir tík á lóðaríi. Annars sefur hann mikið yfir daginn og í alveg yndislegum stellingum - maður vissi varla að það væri hægt að liggja svona - á bakinu með fæturnar uppí loft. Erum að taka á naginu en það er ekkert á heimilinu sem hann hefur ekki reynt að naga þar með talin eyrun á mér. Þá er það bara NEI Brúnó NEI!!! - en hann horfir bara á mann eins og maður sé eitthvað Lúní....

kv
skarpi og co

Sæl kæra Valshamars fjölskylda

Von er alveg yndisleg. Þegar við komum heim með hana í gærkvöldi var hún bara svöng og borðaði allan matinn sinn. Það sýnir hversu róleg og sátt hún var með nýja heimilið sitt. Því þegar við fengum hana í heimsókn síðasta sunnudag þá hafði hún ekki svona mikla lyst og Nína (hinn labrador hundurinn okkar) froðufelldi af afbrýðisemi allan sunnudaginn. Í gær var Nína miklu rólegri og tók Von miklu betur þó hún í raun forðist hana eins og heitan eldinn ;-)

Nóttin var alveg ágæt. Von var í búrinu sínu í svefnherberginu okkar og var nokkuð sátt til að byrja með, svo reyndar vældi hún aðeins í nótt, en róaðist þegar við stungum höndum inn í búr til hennar og þegar Nína kom að kíkja á hana. Hún sækir mikið í Nínu. Óli fór svo með hana út í morgun klukkan sex og gaf henni að borða og var hún hin hressasta eftir það. Síðan tókum við smá lúr og hún aftur í búrinu og það gekk bara vel.

Hún er mjög ánægð hérna úti á palli og í garðinum og finnst frábær að valhoppa um holtið og holtagrjótið okkar. En hún er algjör pissudúkka, svo það eru bara dagblöð út um alla stofu. Hún er alveg yndisleg, róleg og góð en reynir stöðugt að æsa Nínu í leik sem gengur frekar hægt, en það mun vonandi koma.

Leyfum ykkur að fylgjast áfram með og þið eruð alltaf velkomin í heimsókn.
kær kveðja
Vonar fjölskyldan ;-)

Ég tek undir með Skarpa og co. Nói reynir að naga allt sem hann kemst í þar með talið hendur, eyru og nef á mér og öðrum. Eins og þið segið; segja nafn hvolpsins og ákveðið NEI! Svo á strax að rétta þeim leikfang sem má naga. Eins hef ég notað aðeins ráð sem ég las en það er að núa þunnu lagi af Tabasco sósu á það sem ykkur þykir vænst um. Það var svolítið sárt að horfa upp á vælið, grátinn og hlaupin þegar Nói reyndi fyrst að naga eitthvað með sósunni á en ég beindi honum strax að vatnsdallinum og hann lagaðist fljótt. Ég var því aðeins hikandi við að nota þetta í fyrstu en nú set ég þetta á skógrindina,hælana á skónum (ekki leðrið) og ýmislegt í stofunni sem hann má ekki naga. Hann er því farinn að átta sig á því að þetta er ekki gott að setja beittar tennurnar á. Það virðist vera nóg núna að hann finni lyktina og þá heldur hann sig fjarri. Það er því pínulítil lykt hér inni sem minnir á Red Lobster veitingastaðinn... ;) Ég er ekki viss um hversu lengi þetta dugar en þá er að smyrja þunnu lagi á aftur uns hann lærir.

Ég er í bölvuðu basli með pissustand. Það kemur ekki píp frá honum nema hann sé í búrinu en þá lætur hann vita því hann vill ekki pissa í búrið. Ég lendi ævinlega í því að hann pissar smá gusum hér og þar og þó ég setji hann út og hann pissi þá getur vel verið að hann bæti aðeins við nokkrum mínútum eftir að hann kemur inn aftur. :( Ég fór í TAKK hreinlæti í gær; http://takk.is og keypti Blue sprinkler moppuna sem er á forsíðunni. Er líklega svipuð eða sú sama og Berglind er með. Þetta er algjör gargandi SNILLLD eins og ungdómurinn segir. Þetta er ódýrast þarna (3.550) en hann gaf mér góðan afslátt. Sama moppa eða mjög svipuð er á 7-9.000 BYKO og Húsasm. og eitthvað ódýrara í Bónus. Ég mæli með þessu. Nú eru gólfin okkar Nóa alltaf þau hreinustu í 101 R. :)

Nói er búinn að læra að sitja og bíða og er að læra að koma. Hann hlýðir ekki alltaf en þetta er allt að koma. Ég nota líka flautu á hann en ég er nýbúinn að bæta henni við svo hann er ekki alveg viss um hvað ég á við.
Eitt stutt fyrir „Sestu“ og „Bíddu“. Það verður í raun ein og sama skipunin.
Tvö stutt fyrir „Sækja“ eða hverja þá hreyfingu sem hann á að framkvæma nema að koma.
„Bíbb, bíbb, bíbb“ eða nokkurs konar "trilling sound" (nokkur stutt-hækkandi lækkandi hljóð) sem þýðir „Komdu“
Allt er þetta ennþá leikur og við erum líka að æfa okkur í að sækja. Ég fann ágætis plastkút (dummy) í Krónunni á nokkur hundruð krónur. Það var reyndar band þrætt í gegn með hnút á hvorum enda en ég tók það úr. Honum finnst þetta voðalega gaman.

Nói er ekki hrifinn af því að vera í bílnum. Hann vælir og grætur og ýlfrar. Kúkar og pissar þó hann sé nýbúinn að því úti og er voðalega aumur. Mér var sagt að stóra búrið hans væri jafnvel of stórt svo hann væri ekki nógu öruggur þar. Ég keypti því minna búr í Mosó til að hafa í bílnum. Það er lítið betra en ég ætla að prófa að breiða yfir það þannig að hann sjái bara út um eina hlið og sjá hvað það gerir. Það hjálpaði samt ekkert með stóra búrið. Að hafa annað búr er ómetanlegt. Það var allt of mikið vesen að brjóta saman stóra búrið og drösla því út til þess að setja það í bílinn. Búrin í Mosá eru á mjög góðu verði miðað við aðrar búðir sem ég hef skoðað. Þau eru ekki eins vönduð en ættu að duga ágætlega.